जिउनि सोलायनाय
-रनसाइगिरि ब्रह्म
बे जाथाया दिनैनिफ्राय
7 बोसोर सिगांनि बाथ्रा। सानसेखालि आं फराइसालि
फारसे थांबाय थादोंमोन। फराइसालि मोननो गेजेर नांबायमोन। बे समावनो सासे
हिन्जावसाखौ लामाजों खारबोबाय थानाय लोगो मोनदोंमोन। बिनि उन उन सासे 45-50सो
बोसोर बैसोनि हिन्जावखौबो खारबोबाय थानाय लोगो मोनो। बे हिन्जावा आंखौ नुनानै “बिखौ हमथा, बिखौ हमथा” होननानै बुङो। आंबो जेबो गोनो-गोथो
खालामालासे गारिखौ फिदिंफिनना होसोलाङो आरो हिनजावसाखौ हमथायो आरो बिखौ बिमानो
गथायना हाखु-दाखु फरायसालि फारसे आवगाय बोयो। आंहा फुंआवनो थाखो दं हिसाबै, जेबो
राज्लायस्लाबासै आं बिसोरजों। उनाव फरायसालिआव बाथ्राखौ सावरायब्ला फोरोंगिरि
लोगोफोरा आंनो मिथिहोयो। मिथिनो मोननाय बादिब्ला बे हिनजावसाहा खरनि बेराम दङनो।
सम सम बे बायदिनो जाखाङो। जाखांबाथाय खारलाबायो। जोंनि फरायसालिनि 5 किमिसो सानजाहा
थानाय थुरिबारि गामिआव बिसोरनि नवा। गोरिब नखर, बिमाजों लोगोआव फिसाजो सासे आरो
फिसाज्ला सासेल। बिफाया 9 बोसोर सिगांआवनो रुंसारि जालांबाय।
फरायसालि जोबखांनानै
आं नफारसे फैफिनो। जोंहानि ननिफ्राय 20 किमिसो जागोन जोंनि फरायसासिआ। बेआवनो आं
सानखान्थिनि लेङाय फोरोंगिरि हाबा मावो। गोसोआव आंहा बै लामा दथायाव लोगो मोननाय
बिमा-फिसानि सावगारि आसो जाखांफैबाय थादों। फरायसालिखौ नागारना नसिम दोनलांब्ला
हामगौमोन होनना आं सानबाय थादों। नङाब्लाबो इ-रिखसायाव दैखांना हरब्ला हामगौमोन
सान्दों। बेबा माजों थाखो, जिंगासिदोंमोन आं। फारसेथिं, आंबो मालायनि बान्दा- सम
मथे सौहैआब्ला थोजासे बाथ्रा खोनासंनो गोनांजायो। ओरैनोबाबो लावथिनि बिसनिख्रुइ
बाथ्रानि बिस आ थाबखौनो खारदवा। अब्लाबो मदद गैजायैखौ नुनानै आनज्रायनायाबो मोजां आखुथाइनि
नेरसोन जायासै होनना गावखौनो दुसिफ्लांबाय थादों। गोसोआव बेबायदिनो उगुल थुगुल सानबाय
थादोंमोन आं। बे समावनो आयआ मोनाबिलिनि ओंखाम जानो लिंहरो। आं ओंखाम जाफुबाय
थानायावनो थिरांथा लानायसै- गाबोन फुंआवोनो बिसोरनि नआव थांनो आरो गासै थासारिखौ
सुलाद लानो। समाज सिबियारि फोलेरनि गोसो, माबेबा-माबेबा जेंनाखौ नुसनबाथाइ थानोनो
हाया। नंमारगौ फोलेरनि साननाय-हनाय, आखुफोरा इयुनजोलैसिम इसेब्लबो सनदेरमारो। जायखौ बुङो
बिफा जेरै, फिसा एरै।
जेरै साननाय एरै
हाबा। अखानायै फुंआवनो आवगायलांनायसै आं थुरिबारि गामिफारसे। फरायसालिनि
गोरायुंनोबो फनजोंनो सानसेनि सुत्ति लानायसै। लामा गेजेर मोनहैब्ला गोसोआव खें
जाखाफैनायसै। मानसिनि मेलेमाबो एरैबादिसो जेसे बाहायो एसेबां गोबौ जायो। माब्लाबा
नांगौ समावबो गोमानानै थायो। बाथ्राया जाहैबाय- आं जायनि नखराव थागोन- बिसोरनि
थाखाय आं सानसेनि बोथिसे ओंखाम जानायनि जगार। आं साखाथिनि दखानआव माइरं इसे आरो
मैगं बायनानै लाना थाङो।
गामिनि
सुबुंफोरनियाव सोंनानै आं बिसोरनि न मोनहैनायसै। आरो आं गाबज्रिहैनायसै।
नसिनिफ्राय बिमाया ओंखारबोयो। आं आंनि सिनायथिखौ होयो आरो बिखौ आं मादौ
सोमोन्दोजों बाज्रियो। आं लासैनो नखरनि थासारि सोमोन्दै सोंनो हमनायसै। लामायाव
लोगो मोननाय बिनानावनि सोमोन्दै सोंनायसै, बिनि फाहामथाइ सोमोन्दै। मादैनि मेगनाव
मोदै गनायसै आरो दसे सिरि थाहाबदोंमोन। बेसमाव गावखौनो बेबादि सोंनाया गोरोन्थिसो
जाबाय नामा सानफ्लांदों आं। नङा, आं खालि सुलादल लानोल फैयाखै। बबेखानि आं मदद होनोसोफैदों
आरो आं बेखौ मावफुंगोन, बेयो आंनि रादायमोन। लासैनो बाथ्राखौ आं जागाय फिननायसै
आरो लाबोफानाय बोथिसे मायरंखौबो गथाइनायसै। बे समाव आंखौनो इसोर हानना
खुलुमनदोंमोन मादैआ। मादैआ आंनि मोखाङाव नायनानै बुंनायसै- इसोरखौ रावबो नुआखै,
मिथिया बेयो दंमारो नामायो। नाथाइ बे समनिफ्राय आं मोन्दांनायसै- इसोर दं गैया
बेयो आलादा बाथ्रा नाथाइ गोबां राहा गैजायै सुबुंफोरा बिनि सायावनो मिजिंथिनानै
थांनानै दं। सानसे इसोरा जोंखौ अनहरगोन.....। गावखौ गथायनानै दुखुथिया सुबुंफोरा मिजिंनि
साहारा लानानै दं।दागाब मादै आं फैबाय होनना आं बुङो। आंहाबो मेगननिफ्राय गहां
गहां जाथारदों।
लासैनो मादैआ
फोरमायनायसै गासै नखरनि जारिमिन। मादै आ फोरमायदों फिसाज्ला अरनआ नोगोराव खामानि
नागिरनानै थांदों। मैया बिनानावनि जाथाइखौ खोनानानै खामानिखौनो मावजोबालासे
खाबोदोंमोन। आबुङै मावजोबैनि मालिखआ फैसाखौनो हराखै बोराबनानै। मायरंआबो गैयामोन।
आं फिननायसै- मादै
दिनैनिफ्राय नों आंनि बिमादै जाबाय। आं नोंनि आंगो जाबाय। बेखायनो दुखु दाजासै। आं
थासन्दिआव। मादै आ गाबनानै बुंनायसै- नों बहानिफ्रय फैखो फिसा...। जोंनि दुखुखौ
रुजुननो। आं जेरावनिफ्रायनो फैयामानो नों आंखौ गावनि होननानैल सानदो, आं फिनहोयो।
आं बिसोरनि जारलाखौ
नुनानै रुजुनफानो थिरांथा लादोंमोन। नाथाइ आंबो मिथिया माबोरै मदद खालामगोन। आं
मादैनो फैसा इसे होनानै बिदाय लानाफैयो आरो साननैसो उनाव फैफिनगोन होनना नफारसे
आगानसुरो। आं गावखौनो गोजोननायबो मोनदों आरो गिलिर गिलिर बो मोनदों।
जोंनि समाजनि
गेजेराव बेफोरबायदि गोबां बिदिन्थि दं। जायहा गोथार गोसो दं, बिसोरहा रां-रुफा,
गोहो गैजाया आरो जायहा रां-रुफा दं बियोर हा मोजां एबा गोथार गोसो गैजाया।
रां-रुफा थाब्ला आंबो माबायदि जागौमोन इसोरासो मिथिसिगोन। बेखायनो बुंदों- जा जायो
मोजांनि थाखायोसो जायो। आंनि बेलायावथ थिखआनो जाबाय नाथाइ मादै मोननि बेलायाव...।
मादैनि फिसाज्ला
अरुनआ 10 थाखो उथ्रिसारनाय। दा बेयो बिफा रुंसारि जाखांनायनि उनाय गामिनि खामानि
मावग्रफोरजों लोगोसे हाबा मावफायो। खमसे खम बियो लिरनो फरायनो रोंगौ। बे बाथ्राया
आंनो मोनसे थिरांथा लानायाव मदद होबाय। आं गिबिआव अरुननो गंसे स्मार्त पन होबाय आरो
बिखौ सालायनो फोरों बाय। लासै लासै कम्पिउतारबो फोरोंनासै आं अरुननो। बिनि उनाव
साखाथिनि नोगोराव आं अरुननि मुङाव गंसे दखान खुलिनानै होनायसै। लासै लासै दखानआबो
मोजाङै सोलिनो हानाय जाबाय।
आं सरखारि साख्रनि
मोननायनि उनाव गोदान दिल्लीआव थाफैबाय गोजाम गामिखौ गारनानै। अरुन, बिनि बिमा मादै
आरो बिनानावखौ जोबोर गोसोखाङो। गोलाव सुथि लानानै गामिआव थांनो सानो, नाथाइ समानो
मोना जायो। सम सम पनाव रायज्लायनायल जायो।
दिनै अरुना गावनो
हारसिङै मोजाङै गसंनो हानाय जाबाय। बिनि जिउराहाया सोलायबाय। अरुननि जाफुंसारनायखौ
नुनानै आं गावखौनो जोबोर गोजोननाय मोनो, जायखौ जेरावबो नागिरनानै मोना।
नाथाइ बे संसाराव साफ्रोमबो
अरुन बादि खाफाल गोनां नंजोबा.... आंबायदि सुबुंखौ जिउआव लोगो मोननो आरो गासैबो
संसारनि सुबुंआनो आं बायदि जाजोबो.. लामायाव लोगो मोननाय निखाउरिखौ मदद खलामनो।
दहाय ! ..... संसारनि सुबुंफोरा गावजों गाव अनलायनो रोङोमोनब्ला... बयनिबो गोसोआ
गोथार जानायमोनब्ला .... बेसे गोजोन जागौमोन बे संसारा।
