आन्दो गुमुर

आन्दो गुमुर

-जोंब्लाउ ब्रह्म

जोंनि जिउ एबा जोनोमा मोनसे गेदेर सोंलु सिनजों रुजुजायो। थांना थानाय जिउ मोनसेयाव जोंनि सोलोंनो एबा मिथिनो गोनां आयदाफोरा जोबा। जों गोथौयै साननानै नायोब्ला मिथिनो एबा हमदांनो हायो। सुबुंनि बे जिउआ नागिरनायजों आबुं। जों जिउखौ एरैबादि मोन्दाङो, जों माबा नङा माबा नागिरबायो। बे नागिरनाया थुंगे गैयै (जोंनि जिउआ थुंगे गैयै नागिरनायजों बुंफबनाय) आबुं। गोबां आयदायाव दिनै सुबुंआ जौगानो हादोंब्लाबो बेफोर आयदाफोरखौ दासिमबो आबुङै बिजिरनो हाजोबाखै। मानसिया गावनि नाजानायजों दिनै दाउफोरबायदि अख्राङाव बिरनो हादोंब्लाबो, नाफोर बायदि लैथोमानि बिखायाव सानस्रिनो हादोंब्लाबो मानसिया दिनैबो गावखौनो आबुङै सिनायनो, मिथिनो हाजोबाखै। नागिरो गोसोआ, लुबैयो मिथिनो। थारै आं सोर ? सोरमार ? बबेनिफ्राय फैदों ? थैनानै थांब्ला बहा थांगोन ? बबे गोहोआ जोंखौ दैदेनदों, मिथिस्लाबै बबे गोहोआ गोमानायाव जों गोग्लैसोनानै थानो गोनां जायो। बेयो जोंनि सुबुं जिउनि मिथिस हायै आन्दो गुमुर। जों जोंनि गोसो अन्तराव बे गेदेर सोंलुआ बेरखांनायखौ जेब्ला गोर्बोजों मोन्दाङो, अब्लानिफ्रायनो जागाय जेनो मोनसे गोदान मुलुगनि दावबायनाय। जाय मुलुगा आध्यात्मिक रहस्यजों आबुङै साग्लोबसारनाय। बेनि गुन गोहो सैथोथिजों आबुङै बुंफबनानै थानाय बे गोदान मुलुगाव आगान होयोब्ला जोंनि जिउआव अरायथा गोजोननाया फैयो। सास्त्र बिजाबफोराव बे अरायथा गोजोननायखौनो सोर्गो बुंदों। जों थांना थानाय जिउआवनो सोर्गोखौ मोननो एबा नायनो नाजानांगौ। थैनानै थांखांनायनि उनाव जों बेनि जेबो मोन्दांथिखौ मिथिना मोना। गोथांनिफ्राय गोथैयाव सोलायनाया देहानि सोलायनायलसो (रुपान्तर)। जिउनि थैनायखौ फोरमाया। थांना थानाय समाव सत हाबा मावनो रोङाखैब्ला, थैना थांनायनि उनाव सुबुङा अरायथा गोजोननायखौ मोननाय नङा। थांना थानाय जिउआवनो गोजोन खुसि जानो हायाब्ला थैनायनि उनाव गोजोनखौ माबोरै मोननो ? बेयो माब्लाबाबो जाथावा। मानसिया मावनो हायै जेबो खामानि गैया होननानै बुंदोंब्लाबो मानसिआ दिनैबो गावनि सिथ्लायावनो सौथुनानै थैनायनिफ्रायबो बारगआखै।

मोनबा ज्ञान इन्द्रिय- मेगन, खोमा, गन्थं, सालाइ, बिगुरजों हमदांस हायै आरो मोनबा कर्म इन्द्रिय- आखाय, आथिं, खुगा, खिग्रा आरो आथोननि बाहागोजों मोन्दांस'नो हायै (Out of human organs) बिउ आरो जिउमानि गोहोखौ मोनदांनाय एबा सिनायनाया गोरलै नङा। जोंनि गथा देहायाव हाबनानै थानाय सोमोनांथाव मिहिसिन (सुक्ष्मतम) गुनआ जोंखौ दैदेनदों, बेखौ गियान मेगन (Third Eye) जोंसो मोन्दां हायो।

सरासनस्रायै गावखौ दबथायनाय, ह्थानाय, एंगारनाय, बाउसोमनाय गुनफोरखौ सोरजिनानै लानो हायोब्लानो जों गोजोन मोन्नो हायो। नाथाय अरायथा गोजोनखौ मोननो नांगौब्ला जों जोंनि थांना थानाय जिउआव मावनो गोनां सास्त्रनि गोबां बाथ्राफोरखौ मिथिनो गोनांथार। देहा गोनां जिउ मोनसेयाव मिहिसिन (सुक्ष्मतम) जिउमा गोहोजों लोगो मोनलायनायनि माखासे गाहा लामाफोर दं। बेखौ लोगो मोन्नो नांगौब्ला जों बेनिनो महर लानो नांगोन थामहिनबा मिहि जानो नगंगोन। नाथाय थांना थासान्दि, बे गथा सोलेरखौ जों मिहि खालामनो हाया। जोंनि गथा सोलेर आरो गोसोखौ दैदेनग्रा मोन्द रिपुखौ दबथायनो हायोब्लानो मिहि गुनफोरा गावनो गाव बेरखांबोयो। बे मोनद रिपुखौ दबथायनो थाखाय जों गाहायनि माखासे राहाफोरखौ लानो हायो। जेरै-

1. नित्यनि हाबायाव नांथाबनाय।

2. जानाय आदारखौ सायखनानै जानाय।

3. जिउ-जिउमा गुबुन नङै गियानजों सोलिनाय।

4. ॐ –कार जप, प्रणायाम खालामनाय।

5. बेनिनो मोदानफबनाय महरखौ थालोआव लानानै लक्षआव जेब्लाबो नांथाबनाय एबा ज्योति धारन खालामनाय।

मेंनाय बानाय – मोजोमनाय, आंगायनाय गैयाजासे बेफोरखौ आदरै गथि-गथि मावफुंनो नाजाग्रायानो गेदेमा साधु एबा थार भक्ट आरो बेखौ मावफुंब्लासो मिथिगोन मोन्दांसनो हायै मायाजों साग्लोबनाय जिउ आरो जिउमानि आन्दो गुमुरखौ।######

Source: Abung Souvenir,38th Annual Conference, OABDC