असे लोगो
-मधुराम ब्रह्म
बे मुलुग संसाराव गासै सुबुं माहारिफोरानो गावबा-गावनि थाखाय सासे एबा गोबां लोगो सायख’नानै लायो। बेखौ सुबुं माहारिनि आखुथाय एबा हुदा, जेखि बुङामानो थांखिया बेनोदि- लोगोआ गुबुन सासे सोगोनि निदान एबा अलखदनि समफोराव म’दद होनाय। बेफोर बायदि नंलायाब्ला बिसोरनि लोगोथिआ जोरनाय नङा। सोरबाया गावसोरनि लोगोथिखौ अराय गोख्रों आरो गोजोर लाखिनो थाखाय रायजो –राजाफोरनि साखि लालायनानै गावबा-गाव नेमखान्थिनि गेजेरजों सतबांसा लालायनानै जोबोद गाजा-गोमजायै खुंनायखौ नुबोनो मोन्दों। जायखौ बिसिगि एबा बिलोगो खानाय बुंनाय जायो। आथिखालाव नाथाय बेफोर हुदाया गेसें जाबोनो हमबाय। जायखियानो जायामानो लोगोआ लोगोआनो, खैफोद-आफोद, निदाननि समफोराव बायदि बिथिंजों म’दद होनो आवगाय बोनायानोथ’ थार लोगो। बेफोर बायदि नङाब्ला एबा फोथाइखेबस’ खालामोब्ला लोगोनि गोथार मुंखौ गुबुंले खालामनाय जाहैगोन। सासे लोगोआ सोलोंनो गोनां बिबान एबा हाबानि सोमोन्दै उन्दैआव मोनसे सल’ फरायनो मोन्दोंमोन एरैबादि- सानै बिसिगिआ सानसेखालि मोनसे गुदु हाग्राजों थांबाय थानाय समाव मासे मुफुर लोगो मोनहैदोंमोन। मुफुरखौ नुमारनो बिसिगि सासेआ गावजों थांफानाय लोगोखौ नायफिना लासेनो फांसे बिफाङाव गाखो हैगारनायसै। ओजोंहाय गुबुन सासेआ नाथाय बिफाङाव गाखोनो रोङामोन। मा खालामगोन मा मागोन जानानै मोनसे सोलो सानखांगारनायसै। मुफुरा गोथै जिबिखौ जाया होनना खोनानायलाय गावबो गोथैबादि लोर-सोर गैयै जानानै उन्दुना थाफ्लानायसै। मुफुराबो खाथियाव फैनानै गिदिंला-गिदिंलि मोनामसुनानै जेबो खालामालासिनो ब्लद थांफिन गारनायसै। मुफुरा थांखांब्ला बिफां सायाव गाखोनाय बिसिगिया ओंखारबोनानै सोंगारबाय गावनि बिसिगिनाव- मुफुरा नोंथांखौ माबाफोर बुंलांदों नामाब्रा सुखे। ओजों बिसिगिआ बोराबनानै दंखायोमोन। सोंनाय लोगो लोगोनो बुंगारनायसै बिबो- औ बुंलांदोंमोनथ’ अलखदनि समाव मदद होनाय लोगोआसो असे लोगो होननानै आंनि खोमायाव बुंलांदों। बिसिगिनि बे फंनैसो बाथ्राया जोबोर सोलोंनो गोनां। लोगोनि मुङाव फोथायखेबस’ खालामनाय लोगोफोरनि थाखाय। सल’आव बेखौनो फोरांनो नाजादों- थार आरो असे लोगोनि बिबाना मा रोखोमनि जानांगौ। थारैनो बेखौ बयबो मिथिगौदि- गासैबो लोगोफोरनि साननाय हनायफोरा एखे नंजोबा, सोरबाया गाज्रि थांखि लानानैबो लोगो जाफ्लानो हागौ। गावनि हास्थायनाय, लुबैनायखौल’ सुफंनो थाखाय। बैफोर आखुनि लोगोफोरनिफ्राय जेब्लाबो सांग्रां आरो एंगारना थानो हानायआ जोबोर गोनांथार। थार आरो सैथो लोगोआ नाथाय बिब्दि नङा, बियो रां-रुफा एबा जेबो मुलाम्फा लुबैनानै लोगो जाया। गावनि थार आरो सैथो गोसोजों लोगोनि नांगौ समाव म’दद होनो जेब्लाबो नाजायो। बिनिखायनो थार एबा सैथो गोसोनि आखुथाय गोनां लोगोफोरखौ सिनायनानै लोगो जानाया जोबोर गोनांथार।
सोमोनांथाव बे मुलुग संसाराव जोंनि बे जिउमाया मानसि महरै दान्दिसेनि थाखायल’ जोनोम लानानै जोबनो रोङै बायदि हास्थायनानै थार एबा सैथो लोगोखौनो सायख’ना लानो आन्दायो। जाउनाव इयुनावसो उनदाहा मोननो गोनां जायो। गाहायनि सुंद’ सल’खौ फरायोब्ला बुजिगोन होनना आं सानो। सल’आ एरैबादि- सासे सदागरआ साथाम लोगो दङमोन। बिसोरनि सेथिजों एरैबादि लोगोमोनदि- सदागरआ साननि, हरनि माब्लाबाबो बिखौ नागार थारामोन। जायखौ Full Time लोगो होननानै मिथिजायो। नैथिखौ Part Time लोगो, जेरै सेथि लोगोजों जेसेबां सम लोगो जायो बेनि खावसे सम। थेवब्लाबो असे लोगोमोन। थामथिजों नाथाय माब्लाबा समावल’ लोगो जायोमोन। बांसिन समावनो बिखौ गोसो खाङामोन। थामहिनबा गोजाननि लोगो। सानसेखालिनि बाथ्रा, सदागरनाव बिजिरसालिनि बिजिरगिरिनिफ्राय गांसे लायजाम सफैनायसैदि, बियो (सदागरआ) मोनसे दायनि थाखाय बिजिरसालियाव थांनानै बिजिरगिरिनि सिगांआव दाय गैयैनि फोरमान हैनांगौमोन। सदागरनो होमब्ला साखिनि गोनांथि जागारबाय। बियो गावनि बै सेथि लोगोखौ गावजों साखि महरै थांफानो लिंनायसै। नाथाय बिनि लोगोआ थांफानो राजि जायाखिसै। बियो बुंगारबायसो, नोंजों आं अरायसम लोगो महरै थाफायोब्लाबो बे समाव नोंजों थांफानो हानाय नङा, अदेबानि आं नोंनि न’नि लांगोनाखौनो बारनो हानाय नङा। सदागरआ अब्ला गाबा मोखां जानानै थांनायसै नैथि लोगोनि खाथिआव। लांनायसै बिखौबो गावजों थांफानो साखि महरै। नाथाय....! बिबो सदागरजों थांफानानै साखि जाहैनो राजि जायाखिसै। बिबो बुंनायसै आं नोंजों बिजिरसालिनि लांगोनासिमल’ थांफानो हागोन, नाथाय़ सिङाव हाबनानै साखि महरै गसंहैनो हानाय नङा। सिबाय सदागर, हालाय-हाफाय जानांबाय। सोरखौ मोनबावगोन, सोरखौ लिंबावगोन, असे लोगोफ्रानो खुगासो फेनबाय जेब्ला सोरनिखाथिआव थांनानै खावलाय हैबावनो। उन्थाराव बियो सासु-मासु गावनि थामथि लोगोनि खाथियाव थांनानै फोरमाय हैनायसै। थामथि लोगोआबो मिनिस्लु जानानै बुंनायसै- नोंनि असे लोगोफ्रानो नोंखौ म’दद होनो नागिराखिसैब्ला आंनिफ्रायलाय माबोरैथो मदद लुबैबावखो सदागरआ अब्ला मोदै र’थ-र’थ गाबनो हमनायसै। बिनि बेबायदि हालोदखौ नुना लोगोआ अब्ला बुंनायसै। नों जिंगा सिनो नाङा, आं नोंजों साखि महरै थांफानो हागोन। नाथाय आं नोंनि सोमोन्दै जेखौ मिथियो बेखौल’ मिथिहोनो हागोन। बेबायदिनो सदागरनि थामथि लोगोआसो बिनि नांगौ समाव गावनि लोगोनि थार हाबाखौ मावफुंनायसै।
बेनि साथाम लोगोफोरनि सेथिआ जाबाय धोन-दौलत एबा रां-रुपा। सुबुं जिउआ धोन-दौलत एबा रां-रुपाखौनो सिमा गैयाजासे अराय सम मोननो हास्थायो। एंगारनो हायै गावनि असे लोगो बायदि। नाथाय, बे सुबुं जिउआ मुलुगनिफ्राय जेब्ला थांनायनि सम जागोन, गावनि असे होननानै बुंबोनाय बैफोर धोन-दौलतफोरखौ गावजों लोगोसे लांफानो हामारो ना ?
नैथि लोगोनि आखुजों सुबुं जिउनि बाय-बाहागिफोरखौ (नखरनि सुबुंफोरखौ) बुंनाय जादों। धोन-दौलतनि उनाव बयबो गाव-गावनि बाय-बाहागिफोरखौ गोबांसिनै हास्थायो असे होननानै। जेब्ला बे सुबुं जिउनि जोबथा समा फैयो, अब्ला बिनि बाय-बाहागिफोरखौबो असे होननानै बै (सोरगो एबा परमात्मा) फुरिसिम लांफोनो हाया। जिउआ गालांनाय बिनि गोथै देहाखौ बाय-बाहागिफोरा गोथौसालि (सल’आव बिजिरसालिनि लांगोना) सिमल’ थांफानो हायो। बिजिरसालि (बै फुरि) निसिम बिसोरबो थांफानो हाया। अब्ला बिनि नैथि लोगोआबो बेसेबां असे ?
सदागरनि थामथि लोगोनि आखुआ बेयाव धोरोमखौ बुंनाय जादों। सुबुं जिउआ रां-रुपा, बाय-बाहागिफोरखौल’ गावनि असे साननानै धोरोमनि (थामथि लोगो) फारसे बावगार लाङो। जाय लोगोआसो सुबुं जिउ (सल’आव सदागर) जों बिजिरसालि सिम थांफाना जाउमा (बिजिरगिरि) नि खाथियाव साखि महरै गसंहैफानो हायो। बै असे लोगो एबा सैथो धोरोमखौ जों मानो बावगारना थाबावनो। बेनिखायनो बे मुलुग संसाराव दान्दिसेनि थाखाय जोनोम मोननाय सुबुं जिउ महरै सैथो धोरोमखौ सिनायनानै बेखौ गावनि थार एबा असे खालामनानै अराय सम बेखौ ब’जबनानै बिनि दैबथिंनाय लामाजों आवगाय लाङोब्ला थारैनो बे सुबुं जिउआ जोनोम लानायनि थार-गाहामसिन फिथाइखौदि मोनथारगोन, बेयो हले अराय सैथोखा। ######
